पोखरा स्वास्थ्य विज्ञान प्रतिष्ठानको निमित्त उपकुलपति नरेन्द्र

पोखरा एक्सप्रेस ,पोखरा ।

सरकारले पोखरा स्वास्थ्य विज्ञान प्रतिष्ठानको प्रतिष्ठानको निमित्त उपकुलपतिको जिम्मेवारी प्रा. डा. नरेन्द्रविक्रम गुरुङलाई दिएको छ । गत शनिबार जारी गरेको स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने अध्यादेश र सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेशपछि उपकुलपति डा. भरतबहादुर खत्री र निर्देशक डा.प्रेमराज पंगेनीसहित ३१ जना पदमुक्त भएका थिए ।

निमित्त निर्देशकमा भने अहिलेसम्म नियुक्ति भएको छैन । कार्यालयका सूचना अधिकारी सुशील कुमार अर्यालका अनुसार बिहीबार उनको नियुक्ति भएको र शुक्रबार (आज)देखि कार्यभार सम्हाल्ने छन् । पोखरा स्वास्थ्य विज्ञान प्रतिष्ठानअन्तर्गत गण्डकी अस्पताल सञ्चालन र चिकित्सा शास्त्रको स्नातक र स्नातकोत्तरको पढाइ हुँदै आएको छ ।

प्रतिष्ठानमा प्रमुख नहुँदा दैनिक काममा अवरोध उत्पन्न हुने भएपछि सरकारले गुरुङलाई निमित्तको जिम्मेवारी दिएको हो । नरेन्द्रविक्रम सर्जन हुन् । यसअघि उपकुलपतिको आवेदन माग भएको बेला १७ जनाले आवेदन दिएकोमा उनले नाम नै टिपाएका थिएनन् । तत्कालीन केपी ओली सरकारले डा.भरतबहादुर खत्रीलाई उपकुलपति नियुक्त गरेको थियो ।