राष्ट्रिय समस्या बनेको बाँदर व्यवस्थापनका लागि प्रभावकारी कानुन बनाउन अगुवाइ गर्छु । – एमाले कास्की दुईका उम्मेदवार आचार्य

पोखरा २१ निर्मल पोखरीमा कास्की दुईका एमाले उम्मेदवार आचार्य

पोखरा एक्सप्रेस ,पोखरा ।

नेकपा ( एमाले ) कास्की क्षेत्र नं २ का उम्मेदवार रश्मि आचार्यले बाँदरको समस्या राष्ट्रिय समस्या बनेको र यसको ब्यबस्थापनका लागि छुट्टै प्रभावकारी कानुन आवश्यक भएको दाबी गरेका छन् ।

देशैभरका कृषकका उत्पादन बाँदरले नष्ट मात्रै गरेको छैन कतिपय ठाँउमा स्थानीयहरूलाई आक्रमण समेत गरेका घटना प्रति आफ्नो गम्भीर ध्यानाकर्षण भएको जनाएका छन् ।

उम्मेदवार आचार्यले बाँदरको समस्याको दीर्घकालीन व्यवस्थापन जरुरी देखेको भन्दै त्यसका लागि संसद मार्फत ऎन कानुन निर्माण गरि प्रभावकारी कार्यान्वयनका लागि अगुवाई गर्ने प्रतिवद्धता व्यक्त गरे।

आसन्न निर्वाचनका सन्दर्भमा मतदाता भेट्न् पोखरा २१ का विभिन्न स्थान पुग्ने क्रममा स्थानीयहरूबाट गुनासा सुने पछि उम्मेदवार आचार्यले सो कुरा उल्लेख गरेका हुन् ।

विभिन्न कारणले वनजंगलको विनाश हुँदा खानेकुरा अभाव हुनु ,बासस्थानको अभाव जस्ता कारणले बाँदर मानव बस्तितर्फ आकर्शित भएको उनकाे भनाई छ । साेकाे व्यवस्थापनका लागि लागि ऎन कानुन मार्फत नितिगत पहल गर्नुको विकल्प नभएकाे आचार्यले बताए ।

स्थानिय पालिकास्तरमा विभिन्न ठाउँमा जंगलहरूलाई बाँदर आरक्षण क्षेत्र निर्माण गर्ने, जंगली फलफूल सहित खानेकुरा उत्पादन र प्रबर्द्धन गर्न सके बाँदर आफ्नो बासस्थानमै रहन सक्ने उनको तर्क छ।

सुशासनका लागि बाधक विद्यमान ऎन कानुन नीति नियम संसोधन र नयाँ नीति तर्जुमा आवश्यक भएको भन्दै उम्मेदवार आचार्यले आर्थिक विकास राजनीति स्थिरताका लागि संविधानमा समयानुकूल उपयुक्त संसोधन समेत आवश्यक भएको उल्लेख गरे।

कास्की दुईको विशिष्टता अनुसार’सबको साथ सबको विकास’ ,’सँगसँगै विकास र जीवनसँग जोडिएको विकास’ अवधारणा आवश्यक भएको एमालेका प्रभावशाली बैचारिक युवा नेता आचार्यले उल्लेख गरे ।