मकवानपुरमा दुर्घटना हुदा मुख्य न्यायाधीश डाँगीसहित ६ जना घाइते

पोखरा एक्सप्रेस ,हेटौंडा ।

मकवानपुरको भीमफेदी गाउँपालिका-६ जुरिखेतमा स्कार्पियो गाडी दुर्घटना हुँदा उच्च अदालत वीरगञ्जका मुख्य न्यायाधीश गोकर्ण डाँगी सहित ६ जना घाइते भएका छन् । घाइतेमध्ये एक महिलाको अवस्था गम्भीर रहेको मकवानपुर प्रहरीले जनाएको छ ।

आज मंगलबार बिहान करिब ७ बजे काठमाडौंबाट वीरगञ्जतर्फ आउँदै गरेको प्रदेश ३–०१–००२ झ ५१८३ नम्बरको स्कार्पियो जुरीखेतमा अनियन्त्रित भई सडकबाट करिब ५०–६० मिटर तल खोल्सामा खसेको जिल्ला प्रहरी कार्यालय मकवानपुरका प्रहरी नायव उपरीक्षक माधव काफ्लेले जानकारी दिए ।दुर्घटनामा मुख्य न्यायाधीश डाँगीसहित दुई महिला र चार पुरुष घाइते भएका छन् । उनीहरूलाई उद्धार गरी उपचारका लागि भीमफेदी अस्पताल पुर्‍याइएको प्रहरीले जनाएको छ ।

प्रहरीका अनुसार गम्भीर घाइते महिलाबाहेक अन्य पाँच जनाको अवस्था मध्यम रहेको छ । घाइतेहरूलाई थप उपचारका लागि सुविधासम्पन्न अस्पताल लैजाने तयारी भइरहेको छ ।दुर्घटनाको खबर पाएलगत्तै इलाका प्रहरी कार्यालय भीमफेदीबाट ट्राफिक प्रहरीसहित सात जनाको टोली घटनास्थल पुगेको थियो । जिल्ला प्रहरी कार्यालय मकवानपुरबाट प्रहरी उपरीक्षक श्यामबहादुर खत्री नेतृत्वको टोलीसमेत घटनास्थल पुगेको छ ।दुर्घटनामा परेको स्कार्पियो घटनास्थलमै रहेको र सडकमा यातायात भने सुरु रहेको प्रहरीले जनाएको छ।