निर्वाचन आउन ४६ दिन बाँकी

पोखरा एक्सप्रेस , काठमाडौँ

आगामी फागुन २१ गते हुने प्रतिनिधिसभा सदस्य निर्वाचनका लागि निर्वाचन आयोगले आइतबार ७७ वटै जिल्लामा मुख्य निर्वाचन अधिकृतको कार्यालय स्थापना गरेको छ । साथै, ८८ वटा निर्वाचन क्षेत्रमा निर्वाचन अधिकृतको कार्यालय पनि स्थापना गरिएको छ ।

यसैबीच, निर्वाचन आचारसंहिता, २०८२ कार्यान्वयन गर्ने सम्बन्धमा आयोगले आइतबार राजनीतिक दलका प्रतिनिधिहरूसँग छलफल गरेको छ । छलफलमा सहभागी दलहरूले निर्वाचनलाई स्वच्छ, स्वतन्त्र, निष्पक्ष र भयमुक्त वातावरणमा सम्पन्न गर्न प्रतिबद्ध रहेको बताएका छन् ।

दलका प्रतिनिधिहरूले नेपालको संविधान, राजनीतिक दलसम्बन्धी ऐन, निर्वाचन कसुर तथा सजाय ऐन र निर्वाचन आचारसंहितालगायतका कानुन इमानदारिताका साथ पालना गर्ने प्रतिबद्धता जनाए । उनीहरूले आयोग, आचारसंहिता अनुगमन समिति र निर्वाचन अधिकृतले बोलाएको बखत उपस्थित हुने बताएका छन् ।