चौथो हिसान फुटसल प्रतियोगिताको सेमीफाइनल समिकरण पूरा

पोखरा एक्सप्रेस ,पोखरा ।

चौथो हिसान गण्डकी फुटसल प्रतियोगिता २०८२ अन्तर्गत सेमीफाइनल चरणको समिकरण पूरा भएको छ । उच्च शिक्षालय तथा माध्यमिक विद्यालय संघ नेपाल (हिसान) गण्डकीको आयोजना तथा सविन मेमोरियल क्लबको व्यवस्थापनमा पोखरा रंगशालास्थित बहुउद्देश्यीय कभर्डहलमा सञ्चालन भइरहेको प्रतियोगिताको दोस्रो दिनका खेल सम्पन्न भएसँगै अन्तिम चार टोलीको टुंगो लागेको हो ।

सविन मेमोरियल क्लबका अध्यक्ष सञ्जय लिगलका अनुसार प्लस–२ तर्फ बाराही आवासीय माध्यमिक विद्यालय, चिल्ड्रेन लाइफ बोर्डिङ स्कूल, स्टेप बाई स्टेप सेकेन्डरी स्कूल तथा डायमण्ड सेकेन्डरी स्कूल सेमीफाइनलमा प्रवेश गरेका छन् ।

त्यसैगरी कलेजतर्फ इन्फरमेटिक्स कलेज, लेकसिटी कलेज, इन्फोम्याक्स र पिसिएम कलेज अन्तिम चारमा स्थान बनाउन सफल रहे ।

प्लस–२ तर्फका नतिजा
क्वार्टरफाइनल अन्तर्गत बराही आवासीय माविले न्यू ओएसिस एकेडेमीलाई ५–० गोलअन्तरले पराजित गर्दै सेमीफाइनल यात्रा तय गर्‍यो । चिल्ड्रेन लाइफ बोर्डिङ स्कूलले प्रतिभा सेकेन्डरी स्कूलमाथि ६–० को सहज जित निकाल्यो ।

स्टेप बाई स्टेपले फिस्टेल एकेडेमीलाई ८–३ गोलले हरायो भने डायमण्ड सेकेन्डरी स्कूलले बाल कल्याण माविलाई पेनाल्टी सुटआउटमा ५–४ ले पराजित गर्दै अन्तिम चारमा स्थान सुरक्षित गर्‍यो । निर्धारित समयमा खेल १–१ गोलको बराबरीमा सकिएको थियो ।

त्यस्तै, आइतबार बिहान पहिलो सेमीफाइनल खेलमा चिल्ड्रेन लाइफले बाराही माविको सामना गर्ने छ भने दोस्रो खेलमा स्टेप वाइ स्टेप र डायमण्ड मावि सेमीफाइनलमा आमने–सामने हुनेछन् । त्यस्तै सेमीफाइनलका बिजेता टोली भोली नै दिउसो २ बजे हुने उपाधिका लागि भिडने छन् ।