पोखरामा भेडाच्याङ्ग्रा बिक्री गर्न हाटबजार सञ्चालन

पोखरा एक्सप्रेस , कास्की ।

दसैंलाई लक्षित गरी पोखरामा १४ हजार ८०० भेडाच्याङ्ग्रा भित्रिएका छन्। मुस्ताङसहित दार्चुला, बझाङ, बाजुरा र डोल्पाबाट व्यापारीले बिक्रीका लागि भेडाच्याङ्ग्रा ल्याएका हुन्। पोखरा महानगरपालिका–१ सिमपानी र वडा नं. २५ हेमजामा हाटबजार सञ्चालनमा छन्। महानगरपालिकाको पशु सेवा शाखाका पशु चिकित्सक नवराज अधिकारीका अनुसार मुस्ताङबाट नौ हजार, दार्चुलाबाट दुई हजार, बझाङबाट एक हजार ८०० तथा बाजुरा र डोल्पाबाट एक–एक हजार भेडाच्याङ्ग्रा ल्याइसकिएको छ। केही भेडाच्याङ्ग्रा बाटोमै रहेकाले फूलपातीभन्दा एक–दुई दिनअघि बजारमा आइपुग्ने उनले बताए।

गण्डकी प्रदेशका अन्य जिल्लाबाट पनि स्थानीय भेडा बिक्रीका लागि पोखरा ल्याइन्छ। अधिकारीका अनुसार केही व्यापारीले हाटबजारमा भेडाच्याङ्ग्रा ल्याइसकेका छन् भने केहीले पोखरावरपरका चरन क्षेत्रमा राखेका छन्।यसैबीच, पशु सेवा शाखा, भेटेरिनरी अस्पताल तथा पशु सेवा कार्यालय कास्की र पशु क्वारेन्टाइन कार्यालय पोखराको संयुक्त टोलीले भेडाच्याङ्ग्राको स्वास्थ्य अवस्था र बिक्री वितरणको अनुगमन थालेको छ। अनुगमनमा अधिकांश भेडाच्याङ्ग्रा स्वस्थ पाइएको र फूलपातीसम्म अनुगमन जारी रहने जनाइएको छ।

व्यापारीले सम्बन्धित जिल्लाका पशु सेवा कार्यालयबाट स्वास्थ्य परीक्षण गराई प्रमाणपत्र लिएपछि मात्रै भेडाच्याङ्ग्रा ढुवानी गर्ने व्यवस्था छ। अनुगमनका क्रममा बिरामी पशु भेटिएमा अन्य पशुबाट अलग राख्न आइसोलेसनको व्यवस्था गरिएको छ।भेटेरिनरी अस्पताल तथा पशु सेवा कार्यालय कास्कीका प्रमुख डा. ग्रिष्म न्यौपानेले चाडपर्वमा धेरै संख्यामा पशु भित्रिने भएकाले स्वास्थ्य अवस्था र रोगको जोखिमलाई ध्यानमा राखेर अनुगमन गरिएको बताए। उनले खरिद गर्दा पशुको स्वास्थ्यमा ध्यान दिन आग्रह गर्दै श्वासप्रश्वास सामान्य भएको, र्‍याल नबगाएको र रौँ चिल्लो भएको च्याङ्ग्रा छान्न सुझाव दिए।

लामो समय हिँडाएर वा गाडीमा ल्याइएका भेडाच्याङ्ग्रा बध गर्नुभन्दा कम्तीमा २४ घण्टाअघि घरमा ल्याउनु राम्रो हुने उनको भनाइ छ।महानगरपालिकाको पशु सेवा शाखाका अनुसार पोखराको हाटबजारमा च्याङ्ग्रा प्रतिकेजी एक हजार २५० रुपैयाँसम्म र भेडा प्रतिकेजी ७०० रुपैयाँमा बिक्री भइरहेको छ। हिमाली क्षेत्रमा चिसो हावापानीमा हुर्किएका च्याङ्ग्राको मासुको माग दसैँमा पोखरा र आसपासका क्षेत्रमा उच्च हुने गर्छ। पोखरामा सुर्खेत, अर्घाखाँची, दाङ, पाल्पा र तनहुँलगायतका जिल्लाबाट खसीबोका पनि ल्याएर बिक्री गरिन्छ।मुगुका व्यापारी नवराज देवकोटाले हुम्लाबाट ११ दिन लगाएर च्याङ्ग्रा पोखरा ल्याएको बताए। केही ठाउँमा पैदल हिँडाएर र केहीमा गाडीमा राखेर ल्याएको उनले जानकारी दिए। यस वर्ष अविरल वर्षा र पहिरोका कारण ढुवानीमा विगतका वर्षभन्दा बढी कठिनाइ भएको उनको भनाइ छ।

“यसपटक कहिले पानीले सतायो, कहिले बाढीले समस्या भयो। पहिले बजार राम्रो थियो, अहिले बजार पनि राम्रो छैन,” उनले भने।बाटोमा विभिन्न स्थानीय तह तथा पशु सेवा कार्यालयमा तिर्नुपर्ने शुल्क र चरनमा हुने खर्चका कारण च्याङ्ग्राको मूल्य महँगो पर्ने गरेको देवकोटाले बताए।-रासस