धान बेच्न रातभर लाइन बस्छन् किसान, खरिद प्रक्रियामा ढिलाइ

पोखरा एक्सप्रेस ,कैलाली।

घोडाघोडी नगरपालिका–३ निम्दीका स्वरुप चौधरी शनिबार बिहानै भजनीमा धान बिक्रीका लागि पुगे। सरकारले धानको समर्थन मूल्य तोकी धान खरिद सुरु गरेपछि खाद्य व्यवस्था तथा व्यापार कम्पनीको उपकेन्द्र भजनी गोदाममा पुगेका स्वरुपले त्यो दिन पालो पाएन। उनलाई धान बेच्न लागि चार दिन लाग्यो ।

भजनी–४ का राजकुमार चौधरीलाई धान बेच्नका लागि चार दिन लाग्यो। सरकारले तोकेको मूल्यमा धान बिक्री गर्न पाइने आशाले किसान उत्साहित छन्। तर खरिद प्रक्रिया ढिलो भई लामो लाइन बस्दा पालो नआउँदा त्यो उत्साह निराशामा बदलिँदै गएको छ।

कतिपय किसानले बिहानदेखि बेलुकीसम्म कुर्दा धान बेच्न नपाई घर फर्किनुपरेको छ। कति रातभरै केन्द्र अगाडि बस्छन्, भोलिपल्ट पहिलो पालोमा आफ्नो धान बेच्न सकून्।

‘तीन दिन भयो घर फर्किएको छैन। घोडाघोडीका किसान विष्णु चौधरी भन्छन्, ‘धान बेच्न यति दुःख कहिल्यै भएको थिएन। बिहानदेखि बेलुकीसम्म लाइनमा बस्दा पालो आउँदैन, रातमा डल्लफ र धानको सुरक्षा गर्न यही बस्नुपर्छ।’

उनीजस्तै धेरै किसान अहिले सरकारी खरिद केन्द्रमा धान बेच्न दिनरात लाइनमा उभिरहेका छन्। यस वर्ष सरकारले मोटो धानको मूल्य प्रतिक्विन्टल तीन हजार ४६३ तोकेको छ। बजारमा व्यापारीले कम रकममा किन्ने गरेकाले किसान सरकारी मूल्यमा बेच्ने आशामा केन्द्रमा लामबद्ध छन्।

जिल्लामा कात्तिक ११ देखि धान खरिद सञ्चालन गर्ने सूचना निकालिएको थियो। मौसमका कारण कात्तिक १६ देखि धान खरिद सुरु गरेको भजनी खरिद उपकेन्द्रका कर्मचारी भीमबहादुर बुढा बताउँछन्।

प्रतिकिसान ५० क्विन्टलका दरले धान खरिद भइरहेको उनले बताए। बुढाका अनुसार खरिदमा ढिलाइ हुनुको प्रमुख कारण पूर्वाधारको कमी हो।

उनी भन्छन्, ‘धान खरिदका लागि एउटा काँटा मात्र सञ्चालनमा छ। किसानको समस्यालाई दृष्टिगत गर्दै  नगरपालिकासँग समन्वय गरी अर्को काँटा थप्ने तयारी गरिरहेका छौं।’

कैलालीको अधिकांश भूभाग तराईमै पर्छ, जहाँको मुख्य आम्दानीको स्रोत धानलगायत अन्य बाली हो। यहाँका किसानले वर्षभरको मिहिनेत यही बालीमा लगाउँछन्। खेतमा पसिना बगाउने उनीहरूका लागि धान बेच्नु मात्र व्यापार होइन, परिवारको जीविकोपार्जनको आधार हो। तर, धान बेच्ने पालो नपाउँदा उनीहरू समस्यामा छन्।

धान बिक्रीमा ढिलाइ हुँदा किसानको आर्थिक अवस्था प्रभावित भएको छ। खेतमा नयाँ बाली लगाउन  रकम चाहिन्छ, तर धान नबेचेसम्म नगद हातमा आउँदैन। कतिपय किसान बाली बेचेरै घर चलाउँछन्।

घोडाघोडीकी रमिता चौधरी भन्छिन्, ‘धान बेचेपछि तिरौला भनेर सापटी मागी घर खर्च चलाएकी छु। लाइनमा बसेको दुई दिन भयो। खै, कहिले पालो आउँछ।’ खाद्य व्यवस्था तथा व्यापार कम्पनीले धान उत्पादनको पकेट क्षेत्रलाई आधार मानी १३ वटा खरिद केन्द्र सञ्चालन गरिरहेको छ। यसअन्तर्गत नेपालभरि नै कैलालीबाट धान खरिद सुरु गरेको छ।

भजनी, मोहनपुर, सत्ती, गौरीगंगा, जोशीपुर र टीकापुर गरी जिल्लाका ६ वटा खरिद उपकेन्द्रमार्फत धान खरिद गरिरहेको खाद्य व्यवस्था तथा व्यापार कम्पनी सुदूरपश्चिम प्रमुख दीपक थापाले जानकारी दिए। सबै उपकेन्द्रमा किसानको लामो लाइन छ।

कैलालीमा ३५ हजार क्विन्टल धान खरिद गर्ने भनी तोकिएको छ। बिहीबारसम्म ९ हजार क्विन्टल बढी खरिद भइसकेको छ। सरकारको समर्थन मूल्यमै धान खरिद गरिरहेको बताउँदै उनले भने, ‘अरू ठाउँमा मूल्य कम पाउने गरेका कारण सबै किसान खरिद केन्द्रमै आएका छन्। सोही कारण निकै भीड छ।’

अर्कै समस्या जनशक्ति र पूर्वाधार हो। प्रदेश कार्यालयमा कर्मचारीको दरबन्दी कम हुन्छ। चार कर्मचारी, अछाम, बाजुरा, बझाङ, कालिकोटबाट ल्याएको बताउँदै थापाले भने, ‘यसपटक सरकारको बजेटमै धान खरिद गरेबापत रकम किसानको खातामा हाल्ने व्यवस्था गरेकाले कागजात मिलानका लागि एक जना कर्मचारी त्यही व्यस्त हुन्छन्।

त्यसैले धान खरिदमा केही जटिल भएको छ।’ एक उपकेन्द्रमा दुई जना कर्मचारी खटाइएको उनले बताए। बिहान १० बाट ४ बजेसम्म धान खरिद गर्नुपर्ने भए पनि किसानको चापका कारण बिहान ८ देखि सुरु गरी बेलुका ९ बजेसम्म नै धान खरिद गरिरहेको उनले जनाए।–रासस