सेयर धितोमा २५ करोडको सीमा हट्यो

1. पोखरा एक्सप्रेस ,काठमाडौं।

नेपाल राष्ट्र बैंकले सेयर धितो कर्जाको २५ करोडको सीमा हटाएको छ। बुधबार एक सूचना जारी गर्दै बैंकले यसअघि रहँदै आएको सेयर धितो कर्जा हटाएको हो।

यसअघि एकल ग्राहक कर्जा सीमा कुनै एक वा सबै इजाजतपत्र प्राप्त संस्थाहरुबाट सेयर धितोमा प्रवाह हुने मार्जिन प्रकृतिको कर्जाको अधिकतम २५ करोड रुपैयाँ कायम गरिएको थियो।

धितोपत्र बजारमा लगानी गर्ने मुख्य उद्देश्यले स्थापना भएका संस्थागत लगानीकर्ताका लागि मात्र यस्तो सीमा लागू हुने छैन।

यस्तो कर्जा प्रवाह गर्ने बैंक तथा वित्तीय संस्थाले कर्जा प्रवाह वा नवीकरण गर्दा उक्त सीमा ननाघेको यकिन गरेर मात्र कर्जा प्रवाह र नवीकरण गर्नु पर्ने थियो।

तोकिएको सीमा नाघी कर्जा प्रवाह वा नवीकरण गरेमा बैंक तथा वित्तीय संस्थाले उक्त कर्जामा शतप्रतिशत कर्जा नोक्सानी व्यवस्था कायम गर्नु पर्ने व्यवस्था थियो। राष्ट्र बैंकले यी सबै सीमा खारेज गरेको हो।