यमनमा इजरायलको सबैभन्दा ठुलो आक्रमण, आठ जनाको मृत्यु

पोखरा एक्सप्रेस ,पोखरा

इजरायली सेनाले यमनमा अहिलेसम्मकै ठुलो हवाई आक्रमण गरेको दाबी गरेको छ।

हुथी विद्रोहीहरूले बारम्बार गरेको आक्रमणको प्रतिक्रियामा सानामा आक्रमण गरिएको हो।

आक्रमणमा नागरिक र आवासीय भवनहरूलाई लक्षित गरिएको र आठ जनाको मृत्यु भएको बताइएको छ।

साना । आफ्नो वायु सेनाले यमनमा अहिलेसम्मकै सबैभन्दा ठुलो आक्रमण गरेको इजरायली सेनाले दाबी गरेको छ । हुथी विद्रोहीहरूले बारम्बार गरेको ड्रोन र मिसाइल आक्रमणको प्रतिक्रियामा यो आक्रमण गरिएको उसले बताएको छ ।

दर्जनौँ विमानहरूले राजधानी सानामा रहेको हुथी सुरक्षा र गुप्तचर सेवाहरू र सैन्य अड्डाहरूमा बमवारि गरेको इजरायल रक्षा बल (आईडीएफ)ले बताएको छ ।

इजरायलद्वारा गरिएको आक्रमणलाई हुथी सरकारद्वारा सञ्चालित स्वास्थ्य मन्त्रालयले क्रूर अपराध भनेको छ । आक्रमणले नागरिक र आवासीय भवनहरूलाई लक्षित गरेको र यसमा आठ जनाको मृत्यु भएको मन्त्रालयले भनेको छ ।

इजरायली रेड सी रिसोर्ट इलातमा हुथी ड्रोन आक्रमणमा २२ जना घाइते भएको एक दिन पछि इजरायलद्वारा यो आक्रमण भएको हो । रिसोर्टमा भएको आक्रमणमा दुई जना गम्भीर घाइते भएका थिए ।