जाजरकोटका दीपक भए ‘पब्लिक स्पिच नेपाल’को विजेता

पोखरा एक्सप्रेस ,पोखरा ।

जाजरकोटका दीपक राउत ‘पब्लिक स्पिच नेपाल’ को दोस्रो संस्करणको विजेता बनेका छन्।

मेलिशा कार्की दोस्रो र दीपक परियार तेस्रो स्थान हासिल गर्दै क्रमशः रु ३० हजार र रु २० हजारबाट पुरस्कृत भए।

प्रतियोगितामा भ्रष्टाचार नियन्त्रण, बौद्धिक पलायन लगायतका विषयमा धारणा प्रस्तुत गरिएको थियो।

काठमाडौँ । जाजरकोटका १९ वर्षीय दीपक राउत ‘पब्लिक स्पिच नेपाल’ को दोस्रो संस्करणको विजेता बनेका छन् । आज यहाँ आयोजित प्रतियोगिताको अन्तिम चरणको कार्यक्रममा विजयी हुँदै उनले ट्रफीसहित रु ५० हजारबाट पुरस्कृत भएका छन् ।

बागेश्वरी असल शासन क्लब (बास नेपाल) को आयोजनामा भएको प्रतियोगितामा मेलिशा कार्की द्वितीय भएकी छन् भने दीपक परियार तृतीय भए । उनीहरू क्रमशः रु ३० हजार र रु २० हजारसहित पुरस्कृत भए ।

यसैगरी, रु २० हजारसहित उमा कार्कीले ‘पब्लिक च्वाइस अवार्ड’ प्राप्त गरिन् । प्रोत्साहन पुरस्कार प्रार्थना अधिकारी र सान्त्वना पुरस्कार तोरिशा भण्डारीले प्राप्त गरेका छन् ।

प्रतियोगीहरूले भ्रष्टाचार नियन्त्रण, बौद्धिक पलायन, अपाङ्गता,  समावेशिता र प्राकृतिक संरक्षणलगायत विषयमा आफ्नो धारणा प्रस्तुत गरेका थिए । प्रतियोगिताको निर्णायक मण्डलमा राष्ट्रिय सूचना आयोगका पूर्वप्रमुख आयुक्त कृष्णहरि बाँस्कोटा, ‘मोटिभेसनल स्पिकर’ डा.ताराप्रसाद गिरी र वरिष्ठ सञ्चारकर्मी बबिता बस्नेत रहेका बास नेपालका अध्यक्ष नमस्कार शाहले जानकारी दिए ।